30 Tetor 2019 - Nga ligjërata e Prof. Tomorr Plangaricës, i Ftuar Nderi për filimvitin akademik 2019-2020, me studentët e Masterit Profesional të Mësuesisë. “Letërsia dhe gjuhësia” përmes analizës dhe interpretimit të poezisë antologjike të Ismail Kadaresë “Kristal”, u prit me shumë interes e ngjalli pyetje e diskutime me studentët.
Falënderime dhe mirënjohje për ju, Profesor!

Departamenti i Gjeografisë i Universitetit të Tiranës priti një grup të madh të stdentëve të Gjeografisë të Universitetit të Utrehtit (Holandë), të cilët zhvilluan një ekspeditë njohëse studimore rajonale duke përfshirë Bosnjë-Hercegovinën Kosovën dhe Shqipërinë.

Qëllimi i vizitës së tyre ishte njohja me realitetet mjedisore, demografike, dhe urbane të rajonit. Departamenti i Gjeografisë UT u ofroi atyre leksione të shkurtra të fokusuara në njohuritë për Shqipërinë në tematikat e mësipërme në fokus të interesit të tyre studimor. Në vijim të ditës së tyre në Tiranë u organizua një tour nëpër qytet. Kjo vizitë shërbeu edhe për identifikimin e bashkëpunimit midis studentëve të degës së Gjeografisë të të dy Universiteteve.

Në Ditën Ndërkombëtare të Librit në mjediset e sallës “Konrad Adenauer” të Fakultetit të Historisë dhe Filologjisë, Departamenti i Gjeografisë promovoi 3 libra të botuar gjatë vitit 2018. Librat janë dy tekste mësimore për studentët e programit të studimit Master Profesional “GIS i aplikuar” me autorë përkatësisht Prof. Dr. Pal Nikolli dhe Prof.as.dr. Sonila Papathimiu, si edhe një punim doktorature i Dr. Orjana Hanxhari.

Këto botime vijnë si kontribute të rëndësishme në pasurimin e fondit didaktiko-shkencor të Departamentit të Gjeografisë të Universitetit të Tiranës. Këto botime u vlerësuan shumë dhe u pritën me mjaft interes nga kolegët e Departamentit, por edhe më gjerë, si edhe nga studentët e nivelit Bachelor dhe Master. Departamenti i Gjeografisë i falenderon autorët për punën e tyre dhe u uron suksese të mëtejshme në punën e tyre didaktike dhe kërkimore.

Në datat 15-20 prill 2019, një grup studentësh dhe pedagogësh nga Departamentet e Historisë dhe të Arkeologjisë e Trashëgimisë Kulturore të Fakultetit të Historisë dhe të Filologjisë të Universitetit të Tiranës zhvilluan ekspeditë mësimore në Universitetin Kombëtar Kapodistria të Athinës. Vizita u zhvillua në kuadrin e bashkëpunimit mes Fakultetit dhe Ambasadës së Republikës së Greqisë në Tiranë dhe u realizua me mbështet e ambasadores fuqiplotë, znj. Eleni Surani dhe kujdesin e z. Konstandinos Kyriou.